這久記錄這篇食譜海馬泅去這件家己 mā 捌做過 ê 現世，隨想著是人無法度改變慣勢，抑是目頭懸過天 hōo 咱無法度入港隨灣，入鄉隨俗，綿豉無仝鄉仝俗？


寫這段話交彼位短短一面之緣 ê 女子無底代，總是按伊生湠 ê 問題 hōo 我有機會翻頭看家己 mā 捌做過 ê 代誌，像食翁蜜，食甲 buē 記得家己窮實 buē 曉扞鼎 tī 𠢕人頭前展肉跤 ê 見笑代。


像歐洲人是按怎捷食燉肉抑是烘箱料理，我想這交𪜶 ê 廚房多數無安裝燒氣有相干，遮 ê 料理手路 hōo 𪜶 tī 寒人 m̄ 免要意窗仔無通風。


寢頭仔扞鼎，我捌 uī-tio̍h 開窗仔吹燒氣交 gún 翁成做相拍雞仔冤家量債，這久 ê 我 tshan-tshiūnn 入人門，順人意，我無納電錢，我訓練家己窗門開開猶原有法度扞鼎，貧惰洗碗盤 ê 我 mā 訓練家己飯頓 m̄ 免食梅花，m̄-koh 食綢春花(tiû-tshun-hue)，像這出菜，一盤有好幾項菜色，無油煙 ê 番薯、白花仔菜、紅菜頭、紅洋蔥，淡薄仔油煙 ê Lê-bóng 蜂蜜雞襟胸。


寫著 Lê-bóng 想著劉宜里營養師分張 ê 小撇步，食食透寡 Lê-bóng 汁喉韻有無相𫝛 ê 味素，我 bueh 添一句，自跟綴這个小撇步我 mā 發覺烘箱料理 ê 油 ē-tàng 閣較減寡，像白花仔菜烘，往過慣勢濫 2 湯匙(30ml) tsiah 有才調 hōo 伊油光金滑，這久 1 湯匙無閣就有法度烘出芳𩚨軟 ê 白花仔菜。


Lê-bóng 你誠實神奇甲！