巡菜股，翻田塗人又閣成做一隻貓好玄華文世界 ê「麵沙拉」台語按怎講。


好玄成做貓 ê 我揣答案 ê 第一跤步𫝛款是教典，教典無收錄「沙拉」m̄-koh「沙拉油」 ，教典請教 buē 著 ê 智慧，隨踏第二步公視台語台台語新辭庫，公視台語台有收這个我個人感覺誠無聊 ê 辭「Sa-la」，講著德文 ê Salat 英語 ê Salad 我佮意按 iTaigi 請教來 ê「生菜餐」不過我個人佮意講「生菜盤」生菜佮冷盤。


按「沙拉」我又閣好玄華文世界 ê「冷麵」佮「涼麵」敢是我記憶中 ê 講法？


成做貓第一貓𫝛款貓去教典請教，教典無收，換請教公視台語台台語新辭庫，揣著這兩个佮我囡仔時一模一樣 ê 講法冷麵/líng-mī 佮涼麵/liâng-mī，就隨決定 kā 當初跟綴華文思考 ê Grüner Nudelnsalat「阿草麵沙拉」改寫做「阿草冷麵」。


因為請教「沙拉」我看著「甜菜」二字隨閣成做貓想 bueh 知影華文世界 ê「甜菜」佮「甜菜根」敢閣分 buē 清？


甜菜 --- Hello 醫師無分 Swiss Chard & Beetroot，德文號做 Mangold 佮 Rote Beete。


華文 Wikipedia mā bueh 相仝 kā 伊紹介做「變種甜菜」，mā 是 kā Beetroot 佮 Rote Beete 算做 Swiss Chard「甜菜」一款。


植物智識 tī 我 ê 大腦是 Sahara，不過我猶清楚知影 Swiss Chard 佮 Rote Beete 是無仝品種，像菜擴佮大頭菜是無仝 ê 品種，繼續請教 Google 大眾廟，這是我個人認為紹介甲上清楚 ê 一篇「甜菜，甜菜根，，傻傻分不清楚?！」。


因為請教「冷麵」我 mā 學著早前看《台語聽有無》學著 ê 㴘麵，教典有收這个辭，總是有讀 m̄ 知 14，猶原請教 Google 大眾廟，大眾廟 hōo 我這个詳細 ê 紹介：


「㴘」（bāu）的意思，


代表用燒水共食的物件燙予燒。


「㴘」佮「煠」無款，


煠是燃火煮無熟的物件，囥落去「煮」予熟。


「㴘」就是直接用燒水燙過。


若罩霧 ê 疑問，總算 tī 遮揣著答案 --- 2020.10.16.台視台語新聞逐工一字「㴘」（bāu）


我無確定公視台語台 ê 甜菜敢是我想 ê 茄苿菜(ka-bua̍h-tshài)，起因 tī 大眾廟有讀著有人講伊就是「甜菜根」，我 ê 年間無甜菜根 m̄-koh 我捌甜菜(牛皮菜)。


另外，讀著資料講「甜菜根」是「蕪菁」ê 一類，按教典 ê 紹介，伊是大頭菜一類，我就 kā 伊號做紫頭菜，起因伊 ê 色水 tuì 我來講 m̄ 是紅是紫色，較早 kan-ta 歐洲皇室知影按怎染出來 ê 神秘紫色。


巡菜股，翻田塗正經是一件好代誌。